Настна Дмитрийин Игорь
| Настна Дмитрийин Игорь | |
|---|---|
 | |
| Һарсн җил-өдр | 1961 март сарин 14 (65 лет) |
| Төрсн һазр | |
Настна Дмитрийин Игорь (орс. Настынов Игорь Дмитриевич) (төрсн 1961 март сарин 14, Элст) — советскин болн Әрәсән пауэрлифтерч, дасхач, тәмрин кергүдин бүрдәһәч. Нутг хоорндк зергин тәмрин дархн, Әрәсән, Европин болн Нарт-Делкән олн давхр чемпион болн рекордсмен[1]. Хальмг Таңһчин тәмрин сойлын Ачта көдләч. «Чидл-күчнә тәмрин халхсар Хальмг Таңһчин тәмрин школын» директор бәәсмн (2023-гч җил күртл — Таңһчин күнд атлетикин болн пауэрлифтингин олимпийск белдклин баһчудын мергҗлин школ)[2].
2007-гч җиләс авн WPC хүвлврин пауэрлифтингин Нутг хоорндк федерацин Туурмҗин Хорад орсмн.
Намтрнь
Эрт цагнь
1961-гч җилин март сарин 14-д Хальмгт төрсмн. Энүнә эцкнь тосхач, экнь — замч, Игорь болхла — хойр эгчнрин хоорнд төрсн үрн. Школдан сурчаһад көгҗмин школд кларнетар наадг дасҗ (Сикунбаев Абай Жузпековичин классд), дәкәд бокс дасҗ (Яшкулов Виктор Бимбеевичин һардврт) болн бөк бәрлдән (Хальмгин нертә бөкч Тула Балдашиновин һардврт). 1978-гч җилд Виталий Яковлевич Расуловин һардврт күнд атлетикин ард орад, бөдүн улсин негдгч зергиг күцәсмн.
1980-гч җилд Грозный балһснд болсн дууһин-зевсгүдин хамтлагсин Цугсоюзин марһана мөрәлч, ритм—гитарин көгҗмч.
Школан төгсәчкәд, Хальмгин Ик сурһульд зооинженерн факультетд орсмн, хойрдгч курст гер авад, цол уга болад, тәмрән цаг зуур үлдәсмн.
Ик сурһулин хөөн
Хальмгин Ик сурһулиг төгсәчкәд, мергҗлин халхар көдлсмн, тер учрар тәмрәс заагрсмн. 1998-гч җилин декабрь сарла 37 настадан тәмрдән хәрү орад, пауэрлифтингар соньсад, Виталий Яковлевич Расуловин һардврт орад дасна. 1999-гч җилд Әрәсән тәмрин дархна зерг күцәсмн, 2002-гч җилд Нутг хоорндк классин тәмрин дархна нер зүүсмн. Бас тер җилд Әрәсән чемпион болсмн (Советск союзин багд орсмн) бөдүн улсин негдгч зергиг күцәсмн.
Хальмгин Ик сурһулиг төгсәснә хөөн авальтаһан «Ик Царң» комсомолын тосхлтд туссмн.
Колхоз «Коммунистический труд» нерлһтә билә, би тенд зоотехникар, авальм — экономистар көдлвдн, би ус зөөдг машиһәр йовдг биләв, тигәд һурвн җилдән көдлчкәд, 1986-гч җилд Элстүр хәрҗ ирләвдн, — гиҗ Игорь Дмитриевич тодлна.
Игорь Дмитриевич 13 җилдән Аршаня махна комбинатд көдлсмн, түрүләд веттехникар, дарунь белдәчәр. Зуг 1998-гч җилд тер бүрдәц хаагдсмн.
1998-гч җилин декабрь сарин 22-т, сән меднәв, һаза теңгрин бәәдл му билә, зуг, генткн тәмрин хорад яһҗ ирсән медхшв, 20 җилин хөөн би тәмрт хәрү ирв, — гиҗ эн тодлна.
Тер цагас авн пауэрлифтингд орад, өдр ирвәс улм сән аш үзүләд йовсмн.
Расулов Виталий Яковлевич энүнд зааҗ өгсн көтлврәр экләд, Игорь Дмитриевич пауэрлифтингд ирсмн.
Һурвн сар давад, сән аш үзүләд бәәхләнь, дасхачнь тәмрин дархнд күргх седвәрән медүлҗ. Игорь Дмитриевич тиим седвәрт иткәд, чидлән өгәд дасдг болсмн.
1999-гч җилд «Әрәсән тәмрин дархна» зерг үзүлсмн, 2002-гч җилд пауэрлифтингар «Нутг хоорндк классин тәмрин дархна» нер зүүсмн.
Эврә бәәдл-җирһлнь
Өрк-бүлдән һурвн үртә. 1980-гч җилд ууһн көвүнь төрсмн. Дарунь күүкн, дәкәд көвүн төрсмн.
Тәмрин халхар тәвсн күцәмҗс
Настна Игорь пауэрлифтингд үзүлсн ик күцәмҗснь 39 наснас экләд, 60 нас давсна дару чигн болсмн. Эн күн Нарт-Делкән тәмрин ветеран.
Күцәмҗс
Мергҗлин нарт-делкән чемпионатын күрл зергин мөрәлч (2007 җил).
Әрәсән, Европин болн Нарт-Делкән тәмрин ветеранмудин дунд олн давхр чемпион (ветеранмудын әңгллһнә WPC, 2000-гч — 2010-гч җилмүд).
Сочи балһснд болсн 2014-гч җилин Үвлин олимпийск Эстафетын бамбр йовулач (2014 җилин январь сарин 25, Хальмг Таңһч).
Рекордмуд
Настна Игорь 39 настадан — 2000-гч җилд тәмрин марһасд экләд орсмн. 2003-гч җилд 400 кг сууһад авсмн. 405 кг өргәд, хамцудвн 940 кг өргсмн. Настына тәвсн рекордмуд дунд:
- Сун-бослһн: 465 кг (Европын рекорд WPC, 2006).
- Кевтн бәәҗ: 301 кг (эврә рекорд).
- Становая тяга арһар: 345 кг (эврә рекорд).
- Троеборьин хамцу: 1000 кг даву (түрүн болҗ 2005 җилд).
Ветеранмудын дунд олн дәкҗ Европин болн Нарт-Делкән чемпиона нер зүүсмн. 2005-гч җилд Әрәсән WPC чемпионатд орлцад рекорд үзүлсмн — 402,5+230+330.
Бас тер җилд Нарт-Делкән WPC троеборьин марһанд хамцу 1000 кг өргсмн: 417,5 кг, 252,5 кг, 330 кг. 2006-гч җилд, 45 настадан залу улс дунд сун-босн, Европин рекорд тәвсмн — 465 кг хамгин күнд чиңнүрт. Настна Игорь 2010-гч җилмүд күртл марһаст орлцсмн, 2017-гч җилд 56 настадан Волжский балһснд болсн марһанд бас хамгин сән аш үзүләд диилвр бәрсмн.
Күнд атлетикин болн пауэрлифтингин ГОУ РДЮСШ-ин директор
1999-гч җилд Настна Игорь «Урожай» гидг нерәдлһтә баһчудын мергҗлин тәмрин школд дасхачнар экләд көдләд, Таңһчин тәмрин халхар 2023-гч җил күртл көдлсмн[2].
2003-гч җилд ГОУ «Күнд атлетикин болн пауэрлифтингин РДЮСШ» секгдсн цагт Настна Игорь директор болад,[3] дасхачар көдләд йовсмн[2]. Гүн медрлтә, сән мергҗлтә дасхач[4].
Цуг олн медрлән, чадвран, мергҗлән дасхач баһчудтан болн школын багшнртан — дасхачнртан нерәдәд йовна.
Директорин цолдан Игорь Дмитриевич олн тәмрин марһасин керг-үүлдврмүд зуралад, күцәсн мөн, тер мет хамг бүрдәлһнә кергүдиг бас ик медрлтәһәр күцәһәд йовсмн.[2].
Бүрдәцин үүлдврин йовудт олн хәрлцәс тогтаһад, өдр болһна бәәдлиг чикәр зуралҗ залад бәәсмн[2]. Игорь Дмитриевич йир сәәнәр кергүд тогтадг бәәсмн. Бичкдүдин сурһулин дасхлһна эв-арһсин дараг дигтәһәр дигләд давулдг бәәсмн[2].
Тер җилмүдин эргцд Игорь Дмитриевич күнд атлетикин болн пауэрлифтингин девшлтд ик тәвц орулсн мөн.
Энүнә олн сурһульчнр пауэрлифтингар таңһчин, цугәрәсән марһасин дииләчнр болна. Настына Игорин сурһульчнр: Комлаева Анна, Поволоцкая Елена болн Четингов Павел Нутг хоорндк классин тәмрин дархна нер зүүсмн, эдн Европын, Әрәсән болн ЮФО-н чемпионмуд.
Тәмрч паралимпийскин пауэрлифтинг делгрүлсмн. Энүнә сурһульч махмудтан эрмдгтә болв чигн, пауэрлифтингар Әрәсән хувңгин мөрәлч болад, «Әрәсән тәмрин дархн» диг-кемҗәг күцәсмн.
Тәмрин школ көдлсн цагт Нутг хоорндк классин тәмрин дархна нериг 4 күн зүүсмн, 13 тәмрин дархна нертә улс болн олн сурһульчнр тәмрин дархна кандидатнрин нертә.
Таңһчин күнд атлетикин болн пауэрлифтингин школын филиалмуд Көтчнрин, Лаганин, Целинн, Октябрьскин болн Яшкулин районмудт көдлҗәнә.
2014-гч җилин январь сарин 25-д Хальмг Таңһчин элчнр болад, эврәннь сурһульч, Елена Поволоцкаята олимпийск Эстафетын бамбр йовулач болсмн. 2023-гч җилд школ Хальмг Таңһчин эрдм-сурһулин немр бүрдәц болад, «Чидл-күчнә эв-арһсиг республиканск тәмрин школд» (БУ ДО РК «РСШ по СВС») хүврсмн.
Ачлврмуднь
Олн җилдән Хальмг Таңһчин тәмрин девшлтд ик тәвц орулад, дорас өсҗ йовх баһчудыг дасхад йовсн төләд, Настна Игорь 2004-гч җилд Хальмг Таңһчин зуульчллһна, тәмрин болн баһчудын кергүдин Министерствин күндлһнә һашгар шаңнлгдсмн. 2005-гч җилд «Әрәсән Федерацин тәмрин сойлын Отличник» темдгәр ачлгдсмн.
Настна Дмитрийин Игорь хамдан көдлҗ йовх улс дунд, олн тәмрчнрин, дасхачнрин болн сурһульчнрин, эднә эк-эцкнрин дунд ик һавьята багш болҗ күндлгднә.
Темдглл
- ↑ В День народного единства на Пагоде Семи Дней артисты, жители и гости столицы Калмыкии споют гимн России. Дата обращения: 10 март сарин 2026.
- ↑ 1 2 3 4 5 6 Настынов Игорь Дмитриевич. Росдек. Дата обращения: 10 март сарин 2026.
- ↑ Информация о компании (рус.). rating.gd.ru. Дата обращения: 10 март сарин 2026.
- ↑ Елена Абушаева. Жизненное кредо самого сильного в мире калмыка (рус.). mk-kalm.ru. Дата обращения: 10 март сарин 2026.