Бартунов, Олег Сергеевич

Бартунов, Олег Сергеевич (сентябрь сарин 9-д төрҗ һарсмн) — Postgres Professional (Postgres Pro) гидг компанин үүскн бәәһүлгч болн күцәгч закрл^{М.Ф.Решетнев академьчин нертә Сиврин шинҗлх ухан болн технологин ик сурһулин һавьята доктор^[2].}

Намтр

Хальмг Таңһчд төрҗ һарсмн. Элст балһсна 10-гч тойгта дунд сурһульд сурсмн. 1982-гч җилд Москваһин Улсин Ик сурһулин бодьс-зүүһин салвриг төгсәд, одн судлл мергҗлин диплом авсмн^[3]. Яг тер җилдән П.К.Штернбергин нертә Улсин одн судллын күрәлңгин цацргта одн болн галактикүдин тиңкмд номин аҗлтн болҗ аҗллҗ эклсмн^[1]. 2022-гч җилин февраль сарин бәәдләр тендән үрглҗлн аҗллдг^[4].

1999-2002 җилмүдт - Rambler.ru гидг сайтын Research & Development гидг департаментын закрлын орлгч^[1]. 2015-гч җилд һурвн хамт аҗлтн болн нег көрңг орулгчла хамдан эврә PostgreSQL — Postgres Pro гидг түгәлтиг көгҗүлх зөрлһтә «Постгрес Профессиональный» компанин үүскн бәәһүлгчнрин негнь болад, үүндән йирңкә закрлын орм эзлсмн^[1].

Номин үүл-аҗллһн болн күлән зөвшәрлт

2003-гч җиләс авн Тооцалх техникин холвана гешүн.
PGconf.Nepal 2018 болн PGConf.Russia 2018 гидг цуулһна көтлврин хораһин гешүн. PGConf.Russia 2015, 2016 гидг көтлврин хораһин дарһ.
Баһ хурлмудт 90 илдклән умшч өгсн.
2020-гч җиләс авн М.Ф.Решетнев академьчин нертә Сиврин шинҗлх ухан болн технологин ик сурһулин ачта доктор.
ОХУ-ин Ном болн Деед болвсрлын күндин һашг (2020) болн Highload++ гидг умрдшулл (2018) авч^[2].

Бартуновын номин соньрхл: бүр шин оддын тесрлтин тооһин кец, бүр шин оддын шинҗ-чинринь теднә галактикүдин онцмудла хәрцүлхнь болн медәллһин технологиг одн судллд керглхнь^[5].

Ном-зү

Номин седкүлд ниитлгдсн 67 ниитлл.
Дегтр: 1991, Сервисная система «ГАИШ», Бартунов О. С., Осминкин Е. Ю., Прохоров М. Е., Родичев Е. Б., Рыжов А. Б., МГУ Москва, 120 с^[2].

Өрк-бүл болн соньрхл

Гер-бүлтә, тавн үртә. Түүнә соньрхл - холын зәәһин гүүлт, одн судлл, герл зург, уулд йовлһн, волейбол^[1]. Бас Олег хальмг келн болн сойлыг көгҗүлхиг демҗдг. Үлгүрлхлә, хальмг келнә цәкм корпусыг бәәһүлхиг демҗдг юмн^[6].

Темдглл

[Бартунов_СУБД-1] 1,0 ^1,1 ^1,2 ^1,3 ^1,4 БАРТУНОВ ОЛЕГ СЕРГЕЕВИЧ

[ИСТИНА-2] 2,0 ^2,1 ^2,2 ИСТИНА: Бартунов Олег Сергеевич

[3] Известный IT-разработчик Бартунов Олег Сергеевич прочитает лекции в Элисте

[4] Структура ГАИШ: Отдел физики эмиссионных звезд и галактик

[5] Юбилей Бартунова

[6] МОЛИТВЫ НА КАЛМЫЦКОМ, НАЦИОНАЛЬНЫЕ ПРАЗДНИКИ В МЕТА-ВСЕЛЕННОЙ И УРОКИ РОДНОГО ЯЗЫКА: ЦЕНТР ПО РАЗВИТИЮ КАЛМЫЦКОГО ЯЗЫКА ОТМЕТИЛ ЮБИЛЕЙ

[2]

[3]

[1]

[4]

[5]

[6]