Сельгиков, Михаил Арыкович
| Михаил Арыкович Сельгиков | ||||
|---|---|---|---|---|
 | ||||
| Төрсн җил өдрнь | 1920 җилин декабрь сарин 17 | |||
| Төрсн һазрнь | Хальмгин Эврән Засх муҗин Көглт селән; ныне Көтчнрин район, Хальмг Таңһч | |||
| Нас барсн җил өдрнь | 1985 җилин май сарин 16 | |||
| Нас барсн һазрнь | Элиста, Хальмг АССР, Орсин Зөвллтин Холвана Социалист Республик, Зөвллтин Холват Улс | |||
| Холвгддгнь |
 СССР |
|||
| Дәәлснь/дәнь | Төрскән Харсгч Аһу ик дән | |||
| Шаңнлнь |
|
|||
Сельгиков, Михаил Арыкович (1920.12.17, Хальмгин Эврә Засх Муҗ, Көглт - 1985.05.16, Хальмгин Эврән Засх Социалист Республик, Элст) — Зөвллтин Холват Улсин баатр, Төрскән Харсгч Аһу ик дәәнә орлцач, Брянск муҗд йовсн партизанмудын җисәнә орлцач.
Намтрнь
Михаил Селгиков 1920 җилин декабрь сарин 17-д Көглт селәнд малч күүнә өрк-бүлд төрҗ. 1939 җилд Улан Әәрмд мордв.
1941 җилд Михаил Сельгиков Әәдрхнә цергин буудлһна сурһулиг төгсәв. Аһарин дәврлһнәс харсх пулемётын батерейин һардач болад, Төрскән Харсгч Аһу ик дәәнд түрүн өдрәс авн орлцв.
1941 җилд октябрь сарин эклцәр Михаил Сельгиковин һардвр дор туллдана әңг Брянск муҗин Погарск района Карбовка селәнәс Зөвллтин цергүдиг ухрх үүл-йовцыг харсҗ. Бәәр бәрлдәнә цагт Михаил Сельгиков шархдад, олзлгдв. Кесг хуһцан өңгрәд эннь олзлгдлас зулад, Погарск района намин хораһин далд залһлдач Пантелей Михайлович Гирлинәд бултҗ чадсмн. 1941 җилин декабрь сарин 11-д Михаил Сельгиков партизана багд орв.
Брянск муҗиг немшнрәс чөләлснә хөөн Михаил Сельгиков 1943 җилин ноябрь сарас авн Орёл муҗд төрин янз бүрин алвн тушалд аҗлдг бәәсмнҗ. 1943 җилин декабрь сард хальмгудыг Сиврт туусн болад, Михаил Сельгиков 1957 җилин май сар күртл Новосибирск муҗ, Красноярск кизәрт көдлдг бәәҗ. Эк орндан буцҗ ирәд Михаил Сельгиков Элстд әмдрҗ, балһсна күцәгч хорад көдлдг болв. 1968 җиләс авн Хальмг улсин заһс харсх кинлтын бәәцәгч.
1965 җилин май сарин 8-д Михаил Сельгиков Зөвллтин Холват Улсин баатрин цолд күртв.
1968 җилд Михаил Сельгиков «Нәәҗнр минь, партизанмуд» гидг бәрмт тууҗ бичәд, энүг Хальмг дегтр һарһач кевлҗ һарһсмн.
1985 җилин май сарин 16-д Михаил Сельгиков Элстд насан барсмн.
Баатр йовдлнь
1942 җилин апрель сард Сельгиковиг Степан Разина партизан багин штабин ахлач болһҗ төмлв. Михаил Сельгиковин һардсн партизан багнь Вара һолын тагт болн Чубаровск төмр хаалһин тагтыг делвлсмн.
1942 җилин ноябрь сард Михаил Сельгиковиг Фурмановин партизан багин һардачин дарук болһҗ төмлв. Һурвн сарин дотр Михаил Сельгиков тергүтә партизанмуд дәәснә миңһ шаху цергиг устхад, зурһан һал тергиг хаалһаснь һарһҗ, 180 шаху машиныг делвлҗ.
1943 җилин февраль сарин 21-д партизан багнь тавн дууна һазрин Брянск-Гомель чигллин төмр хаалһиг делвлснә аштнь немшнр 28 хонгин туршт һал терг күргҗ чадсн уга болв.
Шаңнлнь
- 10702 тойгта «Алтн Одн» медаль (1965 җилин май сарин 8);
- Ленинә одн (08.05.1965);
- I зергин Төрскән Харсгч дәәнә одн (11.03.1985).
Дурсхлнь
- Элст балһсна нег һудмҗ Михаил Сельгиковин нертә болдмн.
- Элстд бәәдг Баатрмудын һудмҗ гидг дурсхлын цогцлврт Михаил Арыкович Сельгиковин дүрстә дурсхлын самбр бәәдмн.
- Хальмг Таңһчин Көтчнрин района Көглт селәнә дунд сурһульнь Михаил Сельгиковин нер зүүдмн.
Сурвлҗ
- Агарков, Б. М. Партизанские тропы: документальная повесть, Элиста, 1971.
- М. А. Сельгиков / Наши земляки — Герои Советского Союза, комплект из 21 фоторепродукций/ фото С. М. Чупахина, Элиста, 1975, репродукция 18.
- Михаил Арыкович Сельгиков/ Наши земляки — Герои Советского Союза, комплект из 22 буклетов, Элиста, 1985, буклет 19.
- Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2. — С. 434.
Холвас
Михаил Арыкович Сельгиков (рус.). Сайт «Герои страны».