Һурвн әәмг сав (Трипитака)

Һурвн әәмг сав (эндкгин келәр: tripiṭaka; төвд келәр: sde snod gsum; моңһл келәр: гурван аймаг сав; хальмг келәр: Һурвн әәмг сав) — Бурхн багш һаслңгас нөгчснә хөөн, мана үйин өмнк V-III зун жилмүдт бүтәсн Бурхна шаҗна әрүн судр бичгүдин цуглуллһ. Домгт келгдсәр, Бурхн багш һаслңгас нөгчсн хөөн Эндкгт болсн Хувргин түрүңк хургт Бурхна шаҗна һол номин цуглулһ болһҗ батлсн болв.

«Питака» (сав, сагс) гисн нерн дал (пальма) модна навч-хамтхан деер бичәтә болсн номин әәмгиг (номин цуглулһиг) һурвн савд (сагсд) хадһлдг бәәснлә холвата бәәнә гиҗ тәәлврлдг. Эн һурвн савд (сагст) хадһлгдҗ бәәһә номиг әңгләд, һурвн хүвд хувана: «Виная питака» эс гиҗ хальмг келәр «Номһдхлһин әәмг сав», «Сутра питака» эс гиҗ хальмг келәр «Судрин әәмг сав» болн «Абхидхарма питака» эс гиҗ хальмг келәр «Илркә номин әәмг сав».