Таңһчин зәңг (Өдрин соньн)

Таңһчин зәңг (хал. Таңгчин зäңг, Тангчин зянггә, Taŋhçin zәŋ, орс. Областные известия) — 1928-1936 җилд «Красная степь» гидг өдрин соньна ормд сольҗ ирсн Хальмг Таңһчд барлгдҗ һарчасн ниигм, улс төрин соньн болна. Хальмгин тогтмл барин түүкд түрүн болҗ «Таңһчин зәңг» соньн бүклдән хальмг келәр барлгдҗ эклв.

Түүкнь

«Улан тег» өдрин соньна түрүңк һарц 1928 җилин февраль сарин сарын 4-нд һарв. Эн өдрин соньн Хальмг улсин Автономьта орна Большевикмудын Цуг Холвана Коммунист намин бүсин хораһин бәәһүллһ болҗ бәәв. Эн цаг күртл «Улан тег» өдрин соньнд «Таңһчин зәңг» гидг нертә хавсрлт барлгдад бәәв. 1930 җилд «Улан тег» соньн һардган уурч, «Таңһчин зәңг» гидг хавсрлтнь бий даасн һарц болҗ, «Улан теегнь» хавсрлт болҗ хүврв. Түрүләд Астрахань балһснд эн соньн барлгдсн бәәҗ. «Таңһчин зәңг» гидг нертә өдрин соньн бүклдән хальмг келәр һардг өдрин соньн болҗ бәәв. 1928 җилд Цуг Хальмг Таңһчин төрин бәәһүллһс Элcтүр нүүхлә, Таңһчин Зәңгин редакц бас дахад нүүһәд ирҗ. Соньна эрглтиг немхин төлә Элст балһснд Элстин барин үүлдвр гидг нертә барин үүлдвриг бүрдәһәд авч.

Эн соньнд Хальмгин бичәчнр болн шүлгчнр барлгддг бәәҗ. «Таңһчин зәңг» гидг өдрин соньна редакцд Манҗин Нимгр, Майора Бадм, Чапчан Араша, Маслын Алексей, Педерә Дорҗ ордг бәәҗ. Хөөннь Хальмгин Пролетар бичәчнрин ниигмлгин үндсн болсн утх зокалын холвана редакцд цуглрҗ. 1929 җилд эн соньнд 600 орчм сурвлҗлгч көдлҗ бәәв.

Соньна үндсн булңгуднь «Мал аҗ-аху», «Шуудңгин хәәрцг», «Көдәһин сурвлҗлгчин хәрлцәнә булң», «Намин әмдрл» бәәв.

1929 җилд өдрин соньн 1500 хүв ширкгәр һарад бәәв. 1930 җилд 2500 хүв ширкг барлгддг бәәҗ. 1931 җилд соньна эрглт 3900 хүв болҗ немгдв.

«Таңһчин зәңг» өдрин соньн цаг үйд олн зүүлин хальмг үзгәр барлгдҗ бәәсн мөн. Түрүләд хуучн кирилл үзгәр «Таңгчин зäңг», дарунь “Tangchin zyanggä” нертәһәр барас һардг бәәҗ. Кесг хуһцанд латин үзгәр хальмг келәр «Таңхчин зәң» нерәр барлгддг бәәҗ.

1936 җилд «Таңһчин зәңг» гидг нертә өдрин соньн һардган уурч.

Темдглл