Катан Вячеславин Савр
 | Эту страницу в данный момент активно редактирует участник TsaganEgche. |
| Катан Вячеславин Савр | |
|---|---|
 | |
| Һол зәңгллһ | |
| Бүрн нернь | |
| Төрсн җил-өдрнь | 1984 июнь сарин 20 (42 года) |
| Төрсн һазрнь | |
| Мергҗлнь | музыкант |
Катан Вячеславин Савр (орс. Катаев, Савр Вячеславович; төрсн 1984 июнь сарин 20, Лагань, Хальмг Автономн Советск Социалистическ Республик) — Хальмгин үндсни оркестрин художественн ахлач, Хальмгин ду-бииһин «Бамб цецг» хамтлагин һардач, Хальмг Таңһчин билг-эрдмин Ачта үүлдәч, дирижёрч, ниигмин үүлдәч.
Намтрнь
Гнесинихна нертә Әрәсән көгҗмин академиг төгсәчкәд, 2007-гч җилд Хальмг үндсни оркестрин дирижёрин ормд дуудулгдсмн.
2007—2008 җилмүдт кесг концертин эврә көтлврмүд белдҗ үзүлсн төләд Катан Саврт «Улан зала» нерлһтә үндсни мөрә болн Хальмг Таңһчин толһачин баһ наста билгтнрин мөрә заасмн.
2008 җилд Хальмг Таңһчин Государствин симфоническ оркестрд дирижёрчар көдлнә. Тер оркестрта көдлсн цагтан Савр көгҗмин кесг шин төсвмүд тогтасмн. Хальмг государственн филармонин ханьд «Аллегро» гидг дуучнрин хамтлаг тогтаһад, терүнә ашар А.Пьяццоллан нертә Нарт-Делкән марһана мөрәч болна.
2013-гч җиләс авн Хальмг үндсни оркестрин ах дирижёр болсмн.
2020-гч җилин декабрь сарин 30-д Хальмг Таңһчин толһач Хасга Батун № 381-гч-рг тойгта Закврар Хальмг үндсни оркестрин директор болн художественн ахлач болна[1].
2021-гч җилин декабрь сарин 14-д Хальмг Таңһчин толһач Хасга Батун № 376-гч-рг тойгта Закврар ду-бииһин «Бамб цецг» Государственн академическ хамтлагин директор болн художественн ахлач болсмн [2].
Катан Савр Хальмгин көгҗмин билг-эрдм делгрүллһнд ик тәвц орулад йовна. Хальмгин көгҗмиг эн шунмһа кевәр орчлңгин орн-нутгудар тархаһад йовна. Хальмгин көгҗмин билгтә баһчудыг таньлдулад, баһ наста көгҗмчнриг төсвмүдтән орулад, билг-чадврнь улм өөдлүләд бәәнә.
Хальмгин көгҗмин зөөриг өскәд, делгрүләд йовх төләдән Хальмг Таңһчин, Бурят Таңһчин, Ар Осетин, Кабардино-Балкариин сойлын Министерствин күндлһнә һашгудар ачлгдсмн, Хальмг Таңһчин толһачин болн Хальмг Таңһчин Хуралын (Парламентин) ханлтын бичгүд авсн, дәкәд болхла олн-зүсн марһаст орлцад, Әрәсән болн нарт-делкән күндлһнә һашгудар ачлгдсмн.
Хальмгин сойлыг болн Бурхна номиг делгрүллһнә кергт ик тәвц орулсн төләд Бурхн Багшин Алтн Сүмин Алтн одар ачлгдла, дәкәд энүнд ханлтын бичгиг Хальмгин Шаҗн ламин Тэло Тулку Ринпоче бәрүлҗ өглә.
Элстин болн Хальмгин Епархин 25 җилин өөнд нерәдәд Катан Савр өөнин медаляр ачлгдсмн.
Багшин көдлмш
2009-гч җиләс авн Катан Савриг П. О. Чонкушовин нертә билгин колледжд «Оркестрин классин» багшар дуудулҗ оулсмн. 2017-гч җилд Городовиковин Басңгин нертә Хальмгин Ик сурһулин хальмг зевсгүдин оркестр ахлв. Цөөкн җилин хоорнд эн оркестр Италин, Францин, Испанин тәәз деер билгән үзүлв.
2018-гч җилд Катан Савр билгтә баһчудыг дөңнлһнә «Лидер» нертә академиг Элстд бүрдәх седвәр һарһв. Академьд 5-17 наста билгтә баһчуд олн мергҗл: бииһин билг, театрин билг, цокдгч зевсгүдт, гитарт, эстрадын болн олна дууллһна болн хальмг домбр цокдг дасна.
2019-гч җиләс авн Городовиковин Басңгин нертә Хальмгин Ик сурһулин Оютнрин үүләлтин Цутхлңгин директор болв.
Катан Саврин седвәрәр Элстд Хальмгин баһчудын түрүн оркестр тогтагдв. Терүнә һол еүслнь — Әрәсән келн әмтнә көгҗмин билг-эрдмиг дасад, хальмгин баһчудт үзүлҗ медүләд, өдгә цагин көгҗм делгрүләд, баһ наста җөҗгчнриг «ик тәәзлә» таньлдулад, нертә җөҗгчнрлә хамдан концермудт орулх кергүд күцәҗәнә.
Төсвмүд
2015-гч җилд Хальмгин Бурхн Багшин Алтн сүмин талвң деер «Һурвн эрдньд нерәдсн көгҗмин дееҗ» нерәдлһтә төсвиг бүрдәһәд, «Хальмгин 300 домбрчнр» концертиг белдәд давулсмн. Дәкәд Әрәсән өмн үзгин Келн-улсин оркестрмудин марһа давулв.
2016-гч җилд «Хальмгин 500 көгҗмчнр» төсвин үүдәлтин һардач болсмн.
2017-гч җилд «Мадна дирижёрч бол» гидг төсв давулла.
2018-гч җилд «Хальмгин 700 көгҗмчнр» + «Хальмгин 300 дуучнр» төсвин үүдәлтин һардач болсмн.
2018-гч җилд «Хальмгин баһчудын оркестр».
2018-гч җилд Элстд билгтнрин академь секгдсмн.
2019-гч җилд «Һурвн Эрдньд нерәдсн көгҗмин дееҗ» нерәдлһтә төсв (Хальмгин 700 көгҗмчнр орлцв).
Үүдәврмүднь
Катан Савр Хальмгин симфоническ оркестрд болн Хальмгин үндсни оркестрин төлә 500 шаху көгҗмин аранжировкс болн оркестровкс кесмн. Энүнә үүдәврмүдиг Элстин билгин колледжин оркестрин болн Городовиковин нертә Хальмг Ик сурһулин оркестрин репертурт орна.
2013-гч җилд Катан Савр «3 әңгтә хальмг домбрин болн симфоническ оркестрд нерәдсн концерт» үүдәсмн. Тернь хальмг домбрт нерәдсн түрүн академическ концерт болв.
2016-гч җилд Катан Савр Хальмгин баатрльг «Җаңһр» дуулврар 13 әңгтә «Бумбин орн» нерәдлһтә концерт-наад үүдәһәд, тәвсмн. Терүнә премьериг ик туурмҗиаһар 2018-гч җилин март сарла тәвлә.
2019-гч җилд Санкт-Петербургд болсн нарт-делкән «Үндсни цуглавр» марһана «Көгҗмин зокалч» девсңгин мөрә шүүҗ авла.
2020-гч җилд Катан Савр Бурхн шаҗна төрәр көгҗмс бичлә: Хальмгин олн әмтнә шүлгч Нуура Владимир бичсн «XIV-гч Дала Ламд нерәдлһнд» болн «Дәркс» гидг эврән зокалсн биид, дәкәд өөрд-хальмгин зевсгүдин төлә «Мини Хальмг» көгҗмиг Хальмгин Автономин 100 җилин өөнд нерәдсмн. Тер композицснь Хальмг Таңһчд, Әрәсәд, Моңһлд болн Китд ик тааста юолна.
2022-гч җилд «Тууҗ» гидг көгҗмин болн бииһин нааднд көгҗм бичсмн.
Катан Саврин бичсн көгҗмс болн аранжировкс Әрәсән олн тәәз деер цәңгнсмн (Москва, Санкт-Петербург,Казань, Ростов-на-Дону, Белгород, Волгоград, Владикавказ, Нальчик, Ставрополь, Краснодар), дәкәд болхла Европин орн-нутгст (Франц, Испань).
Әрәсән көгҗмин бүрдәцслә давулсн төсвмүд
Катан Савр дирижёрчар көдлҗ йовсн оркестрмуд:
2016 җ., 2018 җ., 2021 җ. — Белгородин госфилармонин оркестр (Белгород, Филармоний)
2016 җ., 2021 җ. — Н. Н. Калинина нертә Орс келн әмтнә зевсгүдин оркестр (Волгоград, Филармоний)
2018 җ.- Л.Зыкинан Государственн академическ орс келн әмтнә ансамбль (Москва, Гнесинихнә нертә РАМ)
2018 г. — «Виртуозы Кубани» нертә Государственн концертин орс келн әмтнә оркестр (Краснодар, Филармоний)
2019 җ., 2021 җ. — «Метелица» нертә Орс келн әмтнә зевсгүдин Государственн оркестр (Санкт-Петербург, Мариинскин театрин концерин ик хора)
2019 җ. — «Дон» нертә орс келн әмтнә зевсгүдин Ростовин государственн филармонин оркестр (Ростов-на-Дону, Филармоний)
2019 җ. — Санкт-Петербургин Государственн концертин орс келн әмтнә зевсгүдин оркестр (Санкт-Петербург, Филармоний)
2020 җ.,2021 җ. — Г. Шендеревин нертә орс келн әмтнә зевсгүдин оркестр (Симферополь)
2021 җ.- Бурятин Таңһчин үндсни оркестр (Улан-Удэ, Оперин театр)
2022 җ.- Мариинскин театрин симфоническ оркестр (Санкт-Петербург, Мариинскин театрин концертин ик хора)
2022 җ.- «Метелица» орс келн әмтнә зевсгүдин Государственн оркестр (Санкт-Петербург, Симфоническ капелла)
2023 җ. — Тыван Таңһчин үндсни оркестр (Кызыл, Тыван Таңһчин көгҗмин болн драмин театр)
Темдглл
- ↑ Распоряжение № 381-рг от 30 декабря 2020 года Главы Республики Калмыкия. glava.region08.ru (30 Бар сарин 2020). Дата обращения: 16 Бар сарин 2025.
- ↑ Распоряжение № 376-рг Главы Республики Калмыкия от 14 декабря 2021 года. glava.region08.ru (9 Бар сарин 2025). Дата обращения: 16 Бар сарин 2025.
Ниитллмүд
- Савр Катаев: Я нашёл своё место в жизни (русский) // Хальмг унн : газета. — 2016. — 15 Мөрн сарин.
- Знаменитый Савр Катаев и 500 музыкантов Калмыкии // kalmykianews.ru/. — 2016. — 13 Мөрн сарин.
- Халгинова Нелли. «Диалог на равных» с Савром Катаевым // tegrk.ru. — 2019. — 23 Туула сарин.
- Буддисты Калмыкии празднуют день рождения Далай-ламы // mk-kalm.ru. — 2020. — 6 Така сарин.
- Савр Катаев с успехом выступил на сцене Санкт-Петербургской академической филармонии // vesti-kalmykia.ru. — 2019. — 13 Үкр сарин.
- «Концерт для калмыцкой домбры» сыграет Белгородский оркестр // riakalm.ru. — 2018. — 15 Хөн сарин.
Холвас
- Официальный сайт Национального оркестра Калмыкии
- Савр Катаев, Главный дирижер Национального оркестра Калмыкии. Заслуженный деятель искусств Республики Калмыкия (2 Лу сарин 2016).
- Савр Катаев: "Я нашёл своё место в жизни". — 2016. — 18 Мөрн сарин.
- «Утро нового дня» В гостях Валентин Лобанов и Савр Катаев (16 Хулһн сарин 2020).
- Калмыцкий музыкант Савр Катаев стал лауреатом престижного конкурса // mk-kalm.ru. — 2019. — 13 Үкр сарин.