Нәәмдгч дүр хүвлһән Зая-пандит

Өөрдин Зая-панидтын нәәмдгч дүр хүвлһән Җамьяң Перлә Бал Замбо (төвд. ’jam-dbyang phrin-las dpal bzang-po; Җөөлн Эгшг Зака-Үүл Цогт Сән) орсин тооллар 1962 җилд төвд Гьямо-Ген гидг нертә селәнд хүвлв.

Орсин тоолар 1979 җилд дунд сурһулян төгскҗ, бурхна номар ик гидгәр соньмсад, эврән терүг сурад бәәдг болв. 1979 җилд эврә дурар гевш Җамьяң Шерак гидг Төвдин ик багшд одад, бурхна номин онл-бүтәлд кицәһәд суув. 1980 җилд Китдт шаҗна төрин бодлһ чөләлгдхлә, гецлин санврт күртәд, 1982 җилд Лаврң киидт одад, Җе Җамьяң Җамцо (төвд. rje ’jam-dbyang rgya-mtsho; хал. Эзн Җөөлн Эгшгтә Дала) сурһлын багшин сурһульд суув. Багшин ном сурад авсн хөөн Җамьяң Перлә Бурхна шаҗна академьд орв.

Тенд Дорд үзгин тууҗ-түүк, келн-зү, шүлглән, орчлңгин тогтац, китд кел, эндкг кел, улс-төр, урн бичлһ, шаҗна үзл, гүн уха, ою судлх, Ик Бодь мөрин үй болн нань чигн сурһуль ахр болзгт сурад, багшнрар һәәхгдәд бәәв. 1996 җилд гелңгин санврт күртәд, багшнрла хамдан Төвдин хотл балһсн Лхасад одад, ном булалдв. Аштнь, 1990 җилд Җамьяң Перлә гевшин цол олв. 1992 җиләс авн Җамьяң Перлә Бурхна шаҗна академин багш болад, хөөннь академин багшнрин хүүв толһалв.

1995 җилд төвд болн моңһл ламнр Җамьяң Перләг Зая-пандитын хүвлһән гиҗ тодрулв. Дарунь Дала-лам болн Богд-гегән терүг батлулад, Богд-гегән Төвдт бичг илгән, Зая-пандитд цуг моңһлчудын шаҗна йос даалһв.

Нәәмдгч дүр хүвлһән Зая-пандитыг Шинҗәңгин Уру Хош гидг һазрин сүмд ширәд залгдв. Эврә шаҗ делгрүлх үүлиг батрулхин төлә арвн һар боть ном бичв.

2015 җилин хаврла Нәәмдгч дүр хүвлһән Зая-пандит Җамьяң Перлә Бал Замбо насан барв. Шин, йистгч хүвлһән ода деерән тодргдад уга.