Чонкуша Очрин Пётр

Чонкуша Пётр
Чонкуша Пётр
	;
Һол зәңгллһ
Бүрн нернь	Пётр Очирович Чонкушов
Төрсн җил-өдрнь	1930 декабрь сарин 7
Төрсн һазрнь	Москва балһсн, СССР[d];
Нас барсн җил-өдрнь	1998 май сарин 6 (67 лет)
Орн-нутгнь	СССР; Орсин Холвана Улс
Мергҗлнь	көгҗм нәәрүләч

Чонкуша Очрин Пётр (орс. Чонкушо́в, Пётр Очи́рович; 1930 декабрь сарин 7, Москва балһсн — 1998 май сарин 6) — советскин болн Әрәсән көгҗм нәәрүләч Хальмг АССР-ин билг-эрдмин Ачта үүлдәч (1980 җ.), РСФСР-ин билг-эрдмин Ачта үүлдәч (1991 җ.), Нәәрмдлин Одна эзн (1996 җ.). Чонкуша Пётр — Хальмгин түрүн мергҗлтә көгҗм нәәрүләч.

Пётр Чонкушовин нертә билг-эрдин колледж, Элст, Хальмг Таңһч

Намтрнь

Эцкнь урднь эскадрона политрук болҗ йовсмн. Дарунь эцкнь олна зарһч, обкомин болн райкомин гешүн, Владивостокд заһсна цуцгшлин комбинатын һардач болҗ көдлҗ йовсмн. Экнь Шопена Җиҗнә түрүн маши залач хальмг күүкд күн бәәсмн^[1].

1944-гч җилд Пётр Октябрьск революцин нертә Москован муҗин көгҗмин училищд орна. Зуг тер җилд цуг хальмгудыг цүллһнд йовулсмн, Пётр бас Сиврүр туугдҗ. 1949-гч җилд Омск балһсна көгҗмин училищ төгсәсмн. Тенд түрүн пьесмуд (скрипкд, фортепианод) болн дуд бичсмн. Хөөннь концертмейстер болн скрипкин наадачар Омскин көгҗмин комедин театрт көдлсмн.

1958-гч җилд Пётр өрк-бүлтәһән Хальмг АССР-т ирсмн. Тер цагт Пётр түрүн үүдәврмүдән һарһад нерән туурулсмн. Тедн дунд Балакан Алексейин «Элстин вальс» гидг дун, дарунь цуг хальмгуд дунд тааста болсмн.

1967-гч җилд Чонкуша Пётр Казань балһсна консерваторин (рус.) (хал. көгҗм нәәрүләчин әңгд орсимн. Консерваторьт сурсн цагтан бичсн үүдәврмүднь Хальмгин көгҗмин түрүн классическ жанрин нәәрүллһс болсмн: концертин, сюитан, поэмин, кантатын.

Чонкуша Пётр — 60 шаху дудын болн романсин көгҗм нәәрүләч. Эн күн Хальмг Таңһчин түрүн көгҗмин хамтлагсиг бүрдәгдсмн: хальмг көгҗмин зевсгүдин оркестр, үләврин оркестр, камерн оркестр, камерн нәәрл дун, хальмг келн-улсин көгҗмсәс тогтагдсн репертуар бас эн үүдәсмн.

Чонкуша Пётр Советск Союзин Баатр О. И. Городовиковин нертә Хальмг шаңһа мөрән мөрәлч, «Хальмг АССР-ин билг-эрдмин Ачта үүлдәч» (1980), «РСФСР-ин билг-эрдмин Ачта үүлдәч» (1991); «Нәәрмдлин Одн (Әрәсә)» (1996), Чонкуша Пётрин нерн Америкин намтрин институтын «Туурмҗин Алтн хорад» бәәнә (Нью-Йорк, 1997).

1998-гч җилин май сарин 6-д насан барсмн^[1].

Санлнь

1999-гч җилин февраль сарин 16-д Хальмг Таңһчин йирңкәлгчин зааврар Элстин билг -эрдмин училищд Чонкуша Очрин Пётрин нерн зүүгдсмн. 2000-гч җилд Чонкуша Пётрин бумб тәвгдсмн (түрвәчнь — Васькин Владимир Савельевич). Элстд Чонкушовин нертә проспект бәәнә. 2001-гч җилд Л. Сафарован «Пётр Чонкушов: жизнь и творчество» гидг дегтр барас һарсмн. 2008-гч җилд Чонкуша Пётрин үүдәврмүдин хураңһу һурвн томд диглрҗ барас һарсмн^[1].

Темдглл

↑ ¹ ² ³ Петр Очирович Чонкушов (неопр.). web.archive.org. Дата обращения: 18 Туула сарин 2026.

[autogenerated1-1] ¹ ² ³ Петр Очирович Чонкушов (неопр.). web.archive.org. Дата обращения: 18 Туула сарин 2026.

[1]